Палескія прыпеўкі гучалі на шостым конкурсе “Бярозаўская сербіянка”. ФОТА

59-годовы  Станіслаў Салаўёў распавёў, што прыехаў на “Бярозаўскую сербіянку” з Брэста. Кажа, што прыехаў “на разведку”, каб у натупным годзе прывезці болей знаёмых гарманістаў

“За некалькі год у мяне 200 песень напісана. Бывае, што ў цягніку еду, ды ў нататнік пішу, калі думкі прыходзяць, ці пабачу нейкую сітуацыю. Бывае проста з лёту пішацца. Гэта не я – гэта натхненне. А так, я былы вадзіцель, я 30 год прапрацаваў вадзіцелем. А ў канцы 2012 году парамантаваў гармонік бацькоўскі і стаў пісаць песні.”

Іосіф Бухта, пескаўскі гарманіст:

“Спяваю з дзяцінства, з 10 год пачаў граць ды спяваць. Граць асобна я не ўмею, а калі спяваю, то ў мяне атрымліваецца. З дзяцінства запрашаюць на вяселлях граць. Выступаю, нядаўна ў Польшчу ездзілі на 4 дні выступаць. Праўда, голас крыху згубіў, а так, магу паспяваць і мужчынскім і жаночым голасам.”

Алена Аўтушка (Жуковіч),  уражэнка вёскі Альшэва Бярозаўскага раёна, разам з сястрой Марыяй Зайцавай, у 2011 годзе прапанавалі арганізаваць фестываль сербіянкі. Іх  ідэю падтрымала супрацоўніца аддзела культуры Бярозаўскага выканкама Галіна Міхневіч — аматарка і выканаўца сербіянкі.

“Бярозаўская сербіянка – 2017”  — свята палескай прыпеўкі, якое ўжо шосты раз адбываецца ў Бярозаўскім раёне. Да свята далучыліся аматары з  Івацэвіцкага, Кобрынскага, Ляхавіцкага і іншых раёнаў Брэсцкай вобласці.

Алена Аўтушка распавяла, для чаго ладзіцца фестываль “Бярозаўская сербіянка”:

“Мы зрабілі такое свята для людзей, каб яны памяталі сваіх продкаў, таму што гэтакім чынам выказваецца да іх павага, калі мы памятаем іх культуру. Калі мы даведаемся, адкуль сербіянка пайшла, да нас прыедуць палякі, украінцы. Мяркуецца, што сербіянка пайшла ад лужыцкіх сербаў, якія жывуць у Германіі. Але, мы дакладна не ведаем.”

Палеская прыпеўка – “сербіянка” — унікальная з’ява ў беларускай палескай вуснай вершаванай, музычнай і танцавальнай  культуры. Чатырохрадковая прыпеўка і танец выконваецца пад гармонік под сваеасаблівую мелодыю . А  спяваецца сербіянка на мілагучным заходне-палескім дыялекце – сумесі украінскай, польскай і беларускай моваў. Сербіянка была неад’емнай часткай святкавання народзінаў, вяселляў, провадаў у армію,  мясцовых сьвятаў. Да 80-х гадоў 20-га стагоддзя Сербіянка мела шырокі распаўсюд на Палессі.