У інтэрнэце збіраюць грошы на помнік Тадэвушу Касцюшку у Косаве

Грошы збіраюцца на краўндфандынгавай платформе “Талака”. Мяркуецца сабраць 11 тысяч рублёў.

На 13 кастрычніка ўжо сабрана 27% патрэбнай сумы – 3005 рублёў. На помнік ахвяравалі сродкі 123 чалавекі.

Як напісаў Глеб Лабадзенка ў сваім фэйсбуку, трэба выправіць сітуацыю, калі ў Беларусі няма помніка Тадэвушу Касьцюшку”:

“Гэтымі днямі, калі ідзе абмеркаванне сітуацыі вакол помніка Касцюшку ў Залатурне, у паветры прагучалі абсалютна справядлівыя думкі і папрокі. Калі Касцюшка – выдатны сын Беларусі, то дзе гэта відаць? Дзе хоць адзін помнік выдатнаму сыну? Сапраўды, ёсць толькі бюст Касцюшку на тэрыторыі амерыканскай амбасады ў Менску і бюст у вёсцы Малыя Сяхновічы, дзе была сядзіба Касцюшкаў.

Не трэба шукаць вінаватых. Трэба браць і рабіць. І зараз ёсць абсалютна рэальная магчымасць паказаць найперш самім сабе, што мы – нацыя, якая шануе сваіх герояў. У Мерачоўшчыне (Берасцейская вобласць), дзе нарадзіўся Касцюшка, дзейнічае ягоны музей. Кіраўніцтва музея з вялікім энтузіязмам успрыняла ідэю паставіць побач помнік нашаму слаўнаму земляку. Арганізацыйныя пытанні яны бяруць на сябе.

А кожны з нас зараз мусіць адкрыць кашалёк і даць капейчыну на гэты помнік, каб ён быў сапраўды народны. На шыльдзе, супраць якой паўстала польская амбасада ў Швейцарыі, планавалася напісаць: “Выдатнаму сыну Беларусі ад удзячных суайчыннікаў”. Невядома, чым скончыцца гісторыя там.
Давайце зробім так, каб гэты надпіс дакладна з’явіўся на шыльдзе пад помнікам у Мерачоўшчыне.
І гэта будзе вельмі сімвалічна, што на 200-я ўгодкі смерці Андрэя Тадэвуша Касцюшкі мы, беларусы, паставім яму два помнікі – на месцы нараджэння і месцы смерці.

За нашу і вашу свабоду!”