У Косаўскім палацы адкрыўся музей. ФОТА

На адкрыцці музея ў Косаўскім палацы прысутнічалі кіраўнік Івацэвіцкага райвыканкаму Аляксандр Грыцук, намеснік старшыні Брэсцкага аблвыканкаму Алег Вялічка, начальнік галоўнага ўпраўлення культуры і аналітычнай работы Міністэрства культуры Васіль Чэрнік.

“Лічу, што гэты велічны помнік архітэктуры заслужана ўключаны ў прыярытэтны пералік рэкстаўрацыі гісторыка-культурнай спадчыны Беларусі, не мае аналагаў у беларускай архітэктуры. З 2008 году на рэстаўрацыйныя работы з абласнога і рэспубліканскага бюджэту накіравана звыш 4 мільёнаў беларускіх рублёў,” – распавёў Аляксандр Грыцук.

Цяпер у палацы працуюць 5 залаў, якія распавядаюць пра гісторыю палаца, роду Пуслоўскіх, гістарычныя падзеі, якія адбываліся вакол палаца. Тут знаходзіцца макет палаца, на стэндах – выявы, як будуць выглядаць памяшканні пасля рэстаўрацыі.

Што да завяршэння рэстаўрацыі – чыноўнікі агучылі, што мяркуецца яе завершыць у 2023 годзе:

“Цяжка адназначна сказаць, але мы плануем да 2023 году поўнасцю завяршыць работы. Для гэтага патрэбныя досыць сур’ёзныя сродкі. На наступны год плануецца прыкладна 2 мільёны рублёў выдзеліць. Гэта вельмі вялікая сума, калі ўлічыць, што за ўвесь час было ўкладзена прыкладна 5 мільёнаў. Таму гэта практычна палова таго, што было ўкладзена за 10 год. Таму праз год мы ўбачым палац у зусім іншым выглядзе,” – распавёў прадстаўнік аблвыканкаму.

Апрача музейнай экспазіцыі частка палацу плануецца здаваць у арэнду – тут будуць кафэ, рэстаран, гатэль. Будзе аднаўляцца і парк каля палаца.

Чыноўнікі мяркуюць, што пасля рэстаўрацыі палацу значна вырасце колькасць турыстаў у Івацэвіцкім раёне:

“Тут недалёка Мір, Нясвіж. Да прыкладу, Нясвіж летась наведала больш 400 тысяч турыстаў. Таму перспектыва ёсць і перспектыва добрая. Гэтыя грошы, якія ўкладаюцца ў адраджэнне нашай гістарычнай спадчыны, будуць акупацца. Я думаю, за досыць невялікі час, цягам 10 гадоў можа акупіцца,” – выказаў аптымістычныя спадзяванні прадстаўнік Брэсцкага аблвыканкама.