Вярхоўны суд Беларусі не задаволіў скаргу незалежных журналістаў з Брэста

У той дзень у гэтым горадзе адбывался акцыя супраць дэкрэта “аб дармаедах”, пасля якой Алеся Ляўчука і Мілану Харытонаву (яны асвятлялі падзею) міліцыянты затрымалі з ужываннем сілы і сапсавалі тэхніку. Таксама на журналістаў-фрылансераў склалі двад пратаколы – за “парушэнне заканадаўства аб СМІ” і “непадпарадкаванне законнаму распараджэнню ці патрабаванню службовай асобы пры выкананні ім службовых паўнамоцтваў”.

На падставе гэтых артыкулаў суддзя Кобрынскага раённага суда Вадзім Здановіч пакараў Алеся Ляўчука штрафам у памеры 60 базавых велічынь штрафу, а Мілану Харытонаву – штрафам у памеры 25 базавых велічынь. Такім чынам, агулам брэсцкія журналісты мусілі сплаціць 1 955 рублёў (больш чым 1 000 долараў у эквіваленце).

Сваё затрыманне і прысуд яны абскарджвалі не толькі ў Брэсцкім абласным судзе, але таксама звярталіся ў МУС, Следчы камітэт, пракуратуру розных узроўняў. Аднак у адказ журналісты атрымоўвалі альбо адпіскі, альбо адмовы вышэйшых судовых устаноў адмяніць рашэнне суда Кобрынскага раёна.

На гэтым тыдні быў атрыманы ліст з рашэннем Вярхоўнага суда РБ, з якога вынікае, што і гэта ўстанова не знайшла парушэнняў падчас разгляду справы журналістаў.

“Такім чынам, мы з Міланай прайшлі ўсе судовыя інстанцыі ў Беларусі, намагаючыся абскардзіць дзеянні праваахоўных структур, – кажа Алесь Ляўчук. – У нас не было ілюзій  наконт высноваў Вярхоўнага суда. Проста мы вырашылі прайсці усе магчымыя інстанцыі, каб пераканацца н“а ўласным прыкладзе, што ў краіне не выконваюцца ніякія правы чалавека, а журналістаў могуць схапіць, збіць, сапсаваць тэхніку, а потым яшчэ і судзіць”.

Алесь Ляўчук і Мілана Харытонава маюць намер звярнуцца са сваімі скаргамі ў Камітэт па правах чалавека, і спадзяюцца, што гэта будзе мець плён.