Іншапланецяне ў музеі: у Івацэічах адкрылася выстава карцін Язэпа Драздовіча. ФОТА-ВІДЭА -

Выстава карцін Язэпа Драздовіча адкрылася ў Івацэвіцкім гісторыка-краязнаўчым музеі. У жыхароў і гасцей нашага гораду з'явілася ўнікальная магчымасць пабачыць працы мастака, якія амаль не выстаўляліся ў іншых мясцінах апроч Мінска. Апроч карцін у Івацэвіцкім музеі выстаўленыя і скульптуры Язэпа Драздовіча.

Сёлета спаўняецца 130 год з дня народзінаў аднаго з заснавальнікаў нацыянальнага гістарычнага жывапісу Язэпа Драздовіча. Ён быў не толькі мастаком, праявіў выдатныя здольнасці таксама як і скульптар, этнограф, археолаг, педагог, літаратар. Язэп Драздовіч быў вельмі шматграннай асобай, у творах якога можна пабачыць нават тагачасны погляд у будучыню і іншыя сусветы.

Напрыклад, некаторыя карціны Драздовіча першай паловы ХХ стагоддзя адлюстроўваюць уяўленне мастака аб жыцці на іншых планетах. У Івацэіцкім музеі вы можаце пабачыць “Сустрэчу вясны на Сатурне” ў выкананні знакамітага мастака.

З выставай можна азнаёміцца ў Івацэвіцкім гісторыка-краязнаўчым музеі, які, дарэчы, сёлета адзначае сваё 25-годдзе. Музей працуе з 8 да 18 у панядзелак-пятніцу і з 9 да 18 у суботу-нядзелю.