З бел-чырвона-белымі сцягамі ў Баранавіцкім раёне адзначылі 155-годдзе Мілавідскай бітвы.ФОТА

Актывісты аб’яднання “Рух за Свабоду” і партыі БНФ запалілі свечкі, усклалі кветкі да капліцы-помніка, выступілі з прамовамі.

Бітва адбылася 3 чэрвеня (22 мая па старому стылю) 1863 году каля вёскі Мілавіды ў сённяшнім Баранавіцкім раёне. Бітва адбывалася паміж паўстанцамі Кастуся Каліноўскага і рэгулярнымі рускімі войскамі.

Бой працягваўся некалькі гадзін, паўстанцы вытрымалі ўсе атакі. Калі стала цямнець, царскія войскі адступілі на зыходныя пазіцыі, страціўшы 50 чалавек забітымі і параненымі. Паўстанцы панеслі страты ў 18 чалавек. На дапамогу рускім спяшалася калона з Нясвіжу, і назаўтра атакі аднавіліся, але паўстанцы да гэтага часу пакінулі лагер і адышлі ў розных кірунках.

Так як поле бою засталося за паўстанцамі, яны сталі на гэтым полі пераможцамі. Забітыя паўстанцы і царскія вайскоўцы былі пахаваны на супрацьлеглых баках шашы.

Сёння помнікі паўстанцам і рускім салдатам стаяць па розных баках “слуцкай” дарогі.

Ушанаванне:

• На месцы пахавання рускіх салдат у 1913 годзе быў усталяваны чыгунны крыж.
• У гонар паўстанцаў была пабудаваная капліца-помнік у 1933 годзе.
• У 1990 годзе ўсталяваны яшчэ адзін памятны знак — камень з мэмарыяльнай плітой і надпісам па-беларуску.
• У 1993 годзе Мілавідскай школе прысвоена імя аднаго з кіраўнікоў паўстанцаў Аляксандра Лянкевіча, памяць пра гэтыя падзеі захоўваецца тут і ў назве вуліцы Паўстанцаў.
• У Мілавідскай школе маецца музей, прысвечаны паўстанню Каліноўскага.

Фота каардынатара Брэсцкай абласной арганізацыі “Рух за Свабоду” Юрыя Казакевіча