Парушэнні працэдуры дзяржаўных закупак тавараў выяўлены ў Брэсцкай вобласці

Паводле службы інфармацыі пракуратуры Брэсцкай вобласці, у 2018 годзе па ініцыятыве пракурораў адмененыя 22 пачатыя з відавочным парушэннем заканадаўства працэдуры дзяржаўных закупак больш чым на 4 мільёны рублёў.

За паўтара месяца 2019 года скасаваны яшчэ 11 працэдур агулам на 4,2 мільёны рублёў.

Асноўная прычына для такой рэакцыі з боку надзорнай установы – няправільны выбар самой працэдуры закупкі, калі замест электроннага аўкцыёну або конкурсу заказчыкі выбіралі контрагентаў праз працэдуры запыту цэнавых прапаноў альбо падрадных таргоў.

Як прыклад, Баранавіцкая міжраённая пракуратура ініцыявала адмену 4 такіх працэдур у сувязі з выкарыстаннем суб’ектам гаспадарання заканадаўства аб закупках у сферы будаўніцтва, якое страціла сілу з 1 студзеня 2019 года.

Пракуроры зафіксавалі таксама шэраг выпадкаў абмежавання добрасумленнай канкурэнцыі шляхам стварэння вузкай спецыфікацыі тавару і падрабязнага апісання яго тэхнічных характарыстык.

Так, у лістападзе 2018 года па ініцыятыве пракуратуры вобласці адна з будаўнічых арганізацый Брэста адмяніла працэдуру таргоў па выбары пастаўшчыка сістэмы відэаназірання для пунктаў мытні коштам больш за 1 мільён рублёў, паколькі ў тэхнічным заданні былі пазначаны канкрэтны таварны знак і назва вытворцы, а таксама вызначаны двухтыднёвыя тэрміны для пастаўкі ўсяго камплекта абсталявання. Гэтыя ўмовы не адпавядалі патрабаванням закона.