У Беларусь вяртаюцца маразы: у бліжэйшыя дні чакаецца парывісты вецер і галалёдзіца

Так, 21 лютага надвор’е ў Беларусі ў асноўным будзе вызначаць няўстойлівая паветраная маса, якая паступае са Скандынавіі.

Днём па паўднёвым захадзе краіны адаб’ецца ўплыў атмасфернага фронту: будзе воблачна з праясненнямі.

Па паўночна-ўсходняй частцы Беларусі, а днём і ў паўднёва-заходніх раёнах Брэсцкай вобласці пройдуць невялікія ападкі, у асноўным снег. На асобных участках дарог чакаецца галалёдзіца.

Вецер прагназуецца паўночна-заходні парывісты, месцамі моцны парывісты. Тэмпература паветра ўначы складзе 1-6 градусаў марозу, днём – ад мінус 4 да плюс 1 градуса. Па паўднёвым захадзе ноччу будзе ад нуля да плюс 1 градуса, днём – 2-4 градусы цяпла. Атмасферны ціск будзе расці.

У наступныя двое сутак (22-23 лютага) надвор’е ў Беларусі будзе вызначаць у асноўным халодны скандынаўскі антыцыклон, які перамяшчаецца праз Балтыйскае мора на тэрыторыю Польшчы, таму ў нашай краіне пахаладае.

У пятніцу – 22 лютага – будзе пераважна без ападкаў, толькі ноччу ў асобных раёнах па паўднёвым захадзе краіны пройдзе кароткачасовы снег. На асобных участках дарог чакаецца галалёдзіца. Вецер прагназуецца паўночны парывісты, па ўсходзе краіны месцамі моцны парывісты.

Тэмпература паветра ўначы складзе 3-10 градусаў марозу, месцамі – мінус 11-13. Днём будзе ад мінус 6 да плюс 1 градуса.

У суботу – 23 лютага – будзе пераважна без ападкаў. На асобных участках дарог чакаецца галалёдзіца. Вецер прагназуецца паўночна-заходні, заходні ўмераны, днём па поўначы парывісты.

Тэмпература паветра ўначы складзе 5-12 градусаў ніжэй за нуль, па ўсходзе месцамі – мінус 13-15. Днём будзе ад мінус 5 па ўсходзе да плюс 2 градусаў па паўднёвым захадзе краіны.