Пракурор просіць расстраляць юнакоў, якія забілі настаўніцу ў Чэрыкаве

Браты прыйшлі адпомсціць 47-гадовай жанчыне, якая працавала настаўнікам-дэфектолагам. Настаўніца паведаміла ў сацыяльна-педагагічны цэнтр пра праблемы мясцовай жыхаркі: маўляў, тая не даглядае сваіх малых дзяцей. Дзяўчына аказалася роднай сястрой «мсціўцаў», якія вырашылі пакараць неабыякавага педагога.

Двое п’яных юнакоў збівалі і катавалі жанчыну, нанеслі ёй больш за сотню нажавых удараў. Пасля скралі камп’ютар і падпалілі дом.

А цяпер пракурор папрасіў, каб братоў прысудзілі да смяротнага пакарання.

І вельмі верагодна, што браты атрымаюць найвышэйшую меру, бо ўвагу на гэтую гісторыю звярнуў персанальна Аляксандр Лукашэнка.

Ён даваў інтэрв’ю галоўнаму рэдактару «Эха Масквы» Аляксею Венедзіктаву. І калі гутарка зайшла пра адмену смяротнага пакарання, Лукашэнка ў якасці прыклада злачынства, за якое чалавек заслугоўвае расстрэл, узгадаў менавіта забойства ў Чэрыкаве:

«Два падонкі, інакш не назавеш, не памятаю, у якім раёне. У іх ужо былі і разбоі, і іншае, і каралі іх. Забілі сваю настаўніцу. За што? За тое, што яна абараняла дваіх дзяцей іх сястры. Сястра ніякая, асацыяльны элемент. [Настаўніца] бараніла і патрабавала забраць іх з сям’і і перадаць у іншую ці ў дзіцячы дом. [Забойцы] яе рэзалі ўсю ноч. Не проста застрэлілі, забілі. Яны яе забівалі ўсю ноч. Яна прасіла іх, маліла. І яны ў рэшце рэшт да раніцы дабілі. Як?»

Прысуд па справе будзе вынесены ў найбліжэйшы час.