Дарагія сябры! Ад пачатку хрысціянства знаходзяцца людзі, якія задаюць пытанне: навошта Бог стаў чалавекам? Манах дамініканец Майстар Экхарт адказвае на гэтае пытанне так: «Дзеля таго, каб Бог нарадзіўся ў нашай душы, а душа ў Богу».
Гэтыя словы мы часта чуем і паўтараем у розных варыянтах. Але ці мы разумеем, усведамляем сабе, што гэтыя словы значаць?
Свята Божага Нараджэння прыгадвае нам не проста кранальную гісторыю пра нараджэнне прыгожага немаўля, а гісторыю нараджэння Божага Сына, гісторыю ўцелаўлёнага Божага Слова! Бог перакрочыў межы прасторы і часу ды ўвайшоў у нашу зямную рэчаіснасць.
Мы ж пакліканы ў нашым духоўным жыцці прайсці адваротны шлях, каб Бог нарадзіўся ў нашай душы, а нашая душа нарадзілася ў Богу, ды такім чынам увайсці ў рэчаіснасць Бога. «…Калі яно [Божае Нараджэнне] не адбываецца ўва мне, то якая мне ад таго карысць?» – сувора запытвае сваіх слухачоў Майстар Экхарт.
Нам часта здаецца, што гэта не магчыма, каб сам Бог нарадзіўся ў нас. Нам здаецца, што мы не годныя гэтага – мы не выконваем Яго запаведзі, мы грашым ды праблемы гэтага свету нас паглынулі… Але насамрэч дастаткова прагнуць Бога, ці хаця б жадаць мець такое прагненне. І вось тады Госпад народзіцца нават у самай неўтульнай пячоры нашага сэрца, каб напоўніць нас сваім святлом і цяплом.
Дык кожнаму, хто мяне сёння чуе, жадаю мець такое прагненне. Прагненне, якое нібы змусіць Госпада нарадзіцца ў нашым сэрцы!
Пробашч уніяцкай парафіі імя Маці Божай Жыровіцкай у Івацэвічах, а.Андрэй Буйніч.
Расклад калядных набажэнстваў:
24.12
18.00 – Вячэрня. Літургія св. Васіля Вялікага.
25.12
10.00 – Літургія св. Яна Залатавуснага.
адрас: Івацэвічы, вул. Касманаўтаў, д. 1
КОММЕНТАРИИ
ОБСУДИТЬ ПРАВИЛА КОММЕНТИРОВАНИЯ