Яна таксама неаднаразова затрымлівалася за ўдзел у несанкцыянаваных вулічных акцыях і каралася ў тым ліку адміністрацыйнымі арыштамі.

Ад праваабаронцаў стала вядома пра тое што ёй інкрымінуюць парушэнне артыкула 342 КК РБ – «дзеянні груба парушаючыя грамадскі парадак».

Сітуацыя датычыць падзеяў 13 верасня 2020 году ў Брэсце, у раёне перакрыжавання праспекта Машэрава і бульвараў Касманаўтаў і Шаўчэнкі. Тады, падчас шэсця праціўнікаў вынікаў выбараў, дэманстранты спыніліся на некаторы час. Сілавікі ў адказ прымянілі вадамёт, а пазней Следчы камітэт распачаў крымінальную справу па згаданым артыкуле.

Па гэтай справе, са словаў праваабаронцаў, праходзяць ужо дзясяткі чалавек, сярод якіх ад нядаўна і Алена Гнаўк.

Што пра сябе распавядае сама Алена Гнаўк

«Тут справа не ў тым што Алена Пятроўна (Гнаўк) жыла-была, да 60-ці гадоў дажыла і стала цікавіцца палітыкай. Я ёй займалася яшчэ ў маладосці.

Потым быў пэўны перапынак, калі я зразумела што тымі спосабамі, якімі дзейнічалі, мы не зможам памяняць гэтую сістэму. Патрэбен нейкі іншы шлях.

Дзесьці ў 1995 годзе я канчаткова адыйшла ад палітычнай дзейнасці і стала на шлях духоўны.

Пэўны час я жыла ў Маскве, але раз-пораз прыязджала ў Беларусь, займалася навуковай працай і пісьменніцтвам. У мяне ёсць апублікаваныя кнігі і гэтыя кнігі хутчэй разлічаны на чыноўніка высокага рангу.

Я вельмі люблю Махатма Гандзі. Гэты чалавек 20 гадоў хадзіў з кіёчкам і рабіў рэвалюцыю, эвалюцыйным шляхам. Я спрабавала данесці нейкія ідэі да чыноўнікаў.

У 2011 годзе я напісала свой твор пад назвай «Асаблівае меркаванне хрысціянкі». Даслала яго ва ўсе міністэрствы, чыноўнікам абласнога маштабу і ў адміністрацыю прэзідэнта. Канешне, гэтым я нарабіла шуму.

Праз пэўны час, пасля гэтага, паводле суду гэтае выданне прызналі экстрэмісцкім матэрыялам.

Потым мяне выклікалі на размову да спадара Валера Вакульчыка (былы старшыня КДБ). Сышліся на тым, што я дала падпіску аб нераспаўсюдзе дадзенага твору, але гэтая кніга, на маю думку, сваю справу зрабіла. Кніга гэта грамадскага, этычнага, духоўнага напрамку. Там ішла гаворка пра мой духоўны шлях.

У тых матэрыялах была мая заява непасрэдна да прэзідэнта і заклікі да ягонага пакаяння і добраахвотнай перадачы ўлады.

Былі тры спробы прыцягнуць мяне да крымінальнай адказнасці, але кожны раз, калі ўлады цікавіліся маімі кнігамі, то прымалася рашэнне закрыць гэтыя справы», – распавядае Алена Гнаўк.

Алена Гнаўк мяркуе, што за яе публічную і непублічную дзейнасць яе могуць пасадзіць за краты.