У Брэсце ўсталявалі беларускамоўныя інтэрактыўныя светлафоры для пешаходаў

Слупкі з электронным начыннем вышынёй крыху больш за метр і кнопкай нядаўна ўсталявалі на скрыжыванні вуліц імя Гаўрылава і Маскоўскай, праспекта Рэспублікі і вуліцы Кастрычніцкай Рэвалюцыі, у многіх яшчэ месцах самага заходняга і адначасова самага паўднёвага абласнога цэнтра Беларусі.

Да гэтага яны добрых паўгода проста ляжалі каля месца ўсталявання. Дарожнікі варушылі зямлю, падводзілі лініі сілкавання. Цяпер нават пры інтэнсіўным руху аўтатранспарта дастаткова скарыстацца з парады, напісанай пад кнопкай: “КАЛІ ЛАСКА,  ДАКРАНІЦЕСЯ”, і загарыцца чырвоны надпіс “ЧАКАЙЦЕ”, а праз пэўны нядоўгі час вам загарыцца зялёнае святло. Пераходзьце! Табло пагасне.

Пра тое, што рэканструкцыя фінансавалася Еўрасаюзам, пацвердзілі ў групе па агітацыі і прапагандзе Брэсцкай абласной Дзяржаўтаінспекцыі: “Так, гэта грошы з супольнага праекту. У нас і шыльда тут вісела раней. “Разумны светлафор” мы яго называем”.

Як бачым, светлафор сапраўды інтэрактыўны, вядзе з чалавекам дыялог і паляпшае камфорт жыцця як пешаходам, так і кіроўцам аўто.

Паводле ўласнай інфармацыі, беларускі Брэст на паляпшэнне дарожнай інфраструктуры (светлафоры з запытам на пераход і\або паказам часу, табло паказу хуткасці,  палепшаныя пераходы) атрымаў фонд велічынёй 1 100 000 (адзін мільён сто тысяч)  еўра.

Мой знаёмец з Германіі некалькі гадоў таму назад пахваліў брэсцкую вулічную інфраструктуру. Маўляў, у вас ёсць нават тое, што мы дома ў Германіі далёка не ўсюды маем – светлафоры паказваюць, колькі секунд засталося чакаць. Мабыць, каб ён ведаў, што даў нам свайго роду прэферэнцыю яго родны Еўрасаюз, то казаў бы іначай. Або і наогул тактоўна прамаўчаў бы.

На той час я і сам не здагадваўся, адкуль такі прагрэс. Адно з лічаных месцаў, дзе еўрапейскія грошы неяк прылюдна пазначылі, было тут. На шыльдзе на будынку абласной ДАІ па вуліцы Купалы, 116 было прапісана “Наименование проекта «Улучшение транспортной доступности в городах Брест и Бяла-Подляска», і далей называліся рамачная для праекта Трансгранічная праграма супрацы Польшчы, Беларусі і Украіны, гады яе рэалізацыі 2014–2020 і Еўрасаюз як крыніца яе фінансавання.

Цяпер шыльду знялі, таму можам з вялікай пэўнасцю дапусціць дзве рэчы. Першая: чыноўнікі канчаткова прысабечаць заслугу ўсталявання брэсцкіх “разумных” светлафораў. Другая: на фоне палітычнага крызісу і адрынання перадавых (і таму багатых) краін,  якія вызнаюць дэмакратычныя каштоўнасці, упэўнена пішам пра “лебядзіную песню” ў атрыманні еўрапейскай дапамогі.

Першае ўсцешыць зусім невялікую колькасць людзей. Другое дык няйначай не зробіць шчаслівым амаль нікога – надта ўжо выглядае на стрэл ва ўласную нагу.