У Брэсце афіцыйны сцяг з’явіўся на тарцы білборда

Першае – гэта чырвона-зялёная маляванка на трубе Цеплаэлектрацэнтралі насупраць Дома правасуддзя.

Новая цікавостка размешчаная пры скрыжаванні вуліц імя Суворава і Кар’ернай у мікрараёне Кавалёва. Сам білборд двухбаковы і прызначаны для тых, хто едзе\ідзе па вуліцы Суворава і прылеглых тратуары ды веладарожцы з боку ракі Мухавец.

Відаць, уладальнікам білборда крыўдна было, што прападае плошча тарца, хай сабе і вузкая. Калі б яны проста размясцілі там сваю мусова невялікую таблічку з рэквізітамі, было б мала прыкметна. Так на таўшчынцы білборда з’явіўся спачатку худы і доўгі “какбыфлаг”, а потым на ім жаданыя рэквізіты.

Пра “трубусцяг” у сеціве пісалі, што ён з’явіўся нездарма. Маўляў, месца асаблівае, са зрушанай нармаллю. Раней у кутку Гарадскога парка і на сённяшняй тэрыторыі ЦЭЦ былі капішча дахрысціянскай багіні нараджэння і памірання Мараны (Мажаны) і капцы-магілы першажыхароў гэтых месцаў. Іх знішчылі, вось продкі і помсцяцца-пракудзяць.

Скрыжаванне з тарцом-сцягам таксама славутае не белай славай: рух тут інтэнсіўны, аварыйнасць вялікая. Нядаўні рэмонт нібыта крыху паспрыяў, але цяпер часта не могуць развярнуцца гарадскія аўтобусы. Ім замінаюць аўтамабілі, якія не паспяваюць павярнуць з Кар’ернай налева ў напрамку мікрараёна Паўднёвага.

А можа, не могуць, бо глядзяць на гэты тарэц?