Сайт і сацыяльныя сеткі папулярнага выдання ў Баранавічах прызналі “экстрэмісцкімі”

Гэта азначае фактычна забойства папулярнага выдання, бо з цяперашняга моманту любое стварэнне, распаўсюд і нават захоўванне матэрыялаў выдання ўлады будуць трактаваць як правапарушэнне альбо злачынства, што цягне за сабой штраф і арышт.

Пра тое, што 29 красавіка адбыўся суд, дзе прымалася адпаведнае рашэнне, паведаміў праўладны канкурэнт выданя Intex-press — газета “Наш край”.

У лютым 2023 года сілавікі ўжо прыходзілі ў “Intex-press” і канфіскавалі тады ўсю тэхніку. Дарэчы, выданне “Інтэкс-прэс” да 2021 года таксама выходзіла на паперы, пакуль Дом друку ў аднабаковым парадку не адмовіўся друкаваць газету

У Беларусі паслядоўна вынішчаецца рэгіянальная незалежная прэса. Раніцай 15 сакавіка ў Вілейцы ў доме галоўнага рэдактара “Рэгіянальнай газеты” Аляксандра Манцэвіча прайшоў ператрус, яго затрымалі. Манцэвіча абвінавачваюць у “распаўсюджванні заведама ілжывых звестак, якія дыскрэдытуюць Беларусь і яе органы ўлады”.

На пачатку красавіка слуцкае выданне “Інфа-Кур’ер” абвясціла пра закрыццё пасля прызнання ўсіх тэкстаў экстрэмісцкімі матэрыяламі. Напярэдадні ў рэдакцыі газеты прайшоў ператрус. Галоўны рэдактар выдання Сяргей Станкевіч і яго намеснік Алег Рубчэня былі затрыманыя. Ім прысудзілі па 15 сутак адміністрацыйнага арышту.