У Івацэвіцкім раёне 92-гадовая ўдава ветэрана 2 месяцы жыла без электрычнасці. Фота-відэа

Хатка Ганны Канановіч (Куратнік) у Краях вельмі маленькая – фактычна адзін пакой. Жанчына ўжо мала рухаецца, яна інвалід першай групы, таму ёй дапамагае сацыяльная работніца Святлана. Родных дзяцей Ганна Канановіч не мае, часам прыязджаюць адведаць пляменнікі.

Наведаўшы пенсіянерку журналісты пераканаліся, што яна сапраўды рыхтуецца да адыходу ў іншы свет – проста ў хаце стаіць надмагільны крыж, на якім толькі трэба будзе пазначыць дату смерці.

Карэспандэнты “ПР” наведаліся да Ганны Канановіч пасля скаргі ў рэдакцыю яе пляменніка Міхаіла Мяліка, які распавёў, што каля двух месяцаў 92-гадовая жанчына жыла без электрычнасці.

“Уключылі нядаўна. А то не было ў мяне святла… Хто яго ведае, чаго. Само па сабе патухла. І скажы гэтай старшыні (Рэчкаўскага сельвыканкаму  – ПР) – ай… Я тут, хлопчыкі, не жыву, а бядую. Ужо хачу каб смерць мяне прыняла,” – гаруе Ганна Канановіч.

Урэшце, як распавяла сацыяльная працаўніца Святлана, пасля зваротаў, электрычнасць у хаце Ганны Канановіч наладзілі. На час, калі не было святла, сацыяльная працаўніца дала пенсіянерцы ліхтарык, каб бабуля хоць неяк магла перасоўвацца па хаце.

“Яна ўжо прывыкла за гэты час да ліхтарыка. Я ёй яго зараджаю, і яна пры патрэбе з ім уначы ходзіць,” – кажа Святлана.

Як распавяла пенсіянерка, старшыня Рэчкаўскага сельвыканкаму Ганна Латышэвіч прапаноўвала ёй паехаць у дом састарэлых:

“А я ёй сказала, што не пайду, я маю 92 гады, і я сказала, што ў сваёй хаце памру, я не хачу ў дом для састарэлых,” – апавяла Ганна Канановіч.

Міхаіл Мялік, пляменнік Ганны Канановіч, які жыве ў іншай вёсцы, кажа, што гэтую хату пенсіянерка набыла каля 10 гадоў таму, аднак, не мае на яе дакументаў, таму за многія паслугі плаціць без ільгот. Міхаіл Мялік кажа, што звяртаўся да розных прадстаўнікоў мясцовай улады, і нават у ваенны камісарыят, каб лепей апекаваліся ўдавой ветэрана вайны.

“Яе пакойны муж франтавік быў, Берлін браў, некалі яму нават “Запарожца” давалі. А цяпер нікому нічога ня трэба. Сядзеў во чалавек 2 месяцы без святла,” – абураецца Міхаіл Мялік.

Старшыня Рэчкаўскага сельвыканкаму Ганна Латышэвіч патлумачыла, што праблему з электрычнасцю ў хаце пенсіянеркі яна вырашыла, як толькі ёй пра гэта паведамілі:

“Я вырашала гэтую праблему, і вырашыла. Чаму адразу было да мяне не звярнуцца. Як толькі я даведалася, мы гэтае пытанне вырашылі адразу ж. Я гэтую бабулю часта наведваю, проста была пэўны час у адпачынку. Але я гэтую бабулю вельмі добра ведаю, і вельмі часта там бываю”.

Як распавяла Ганна Латышэвіч, пенсіянерка жыве на тэрыторыі сельсавету з 2008 году. І жыве яна фактычна не ў доме, а ў летняй кухні суседняга дому. Старшыня сельвыканкаму кажа, што ў сувязі з адсутнасцю блізкіх сваякоў, прапаноўвала бабулі хаця б на зіму пасяліцца ў сацыяльны прытулак, але жанчына не хоча.

Апроч таго, старшыня сельвыканкаму патлумачыла, што ў пенсіянеркі ёсць лепшая хата ў вёсцы Выганашчы, аднак яна не ўступае ў валоданне ёй па спадчыне.

“Прымусіць жа чалавека гэта зрабіць мы не можам,” – кажа Ганна Латышэвіч.

Старшыня сельвыканкаму тлумачыць, што аформіць дом, дзе жыве пенсіянерка Ганна Канановіч, немагчыма паводле закону. Таму жанчыне “прапаноўвалі розныя варыянты”, але яна адмаўлялася.