Першы пікет па збору подпісаў за кандыдата ў дэпутаты адбыўся ў Брэсце

Ініцыятыўная група Ганны Канюс правяла пікет на вул. Гаўрылава насупраць гіпермаркета Green. Прысутнасць прэтэндэнткі, зладжаная праца каманды і адкрытасць актывістаў выклікала цікавасць у мінакоў.

 «Да нас падыходзіла шмат жыхароў мікрараёна. Адны цікавіліся маёй біяграфіяй, іншыя беларускай сістэмай выбараў. Але больш за ўсё гараджане казалі пра тое, што законы і практыка іх прымянення на месцах несправядлівыя. У многіх ужо апусціліся рукі, і яны не вераць ужо нікому. У адказ мы прыводзілі прыклады, калі салідарнымі дзеяннямі можна дабіцца справядлівасці і захавання правоў грамадзяніна» – каментуе вынікі першага дня збору подпісаў Ганна Канюс, лідэр брэсцкіх сацыял-дэмакратаў, актывістка кампаніі «За наш горад».

Па завяршэнні пікету збор подпісаў прадоўжыўся ў дамах акругі. Усяго за 3 гадзіны было сабрана 75 подпісаў выбаршчыкаў.

«Я ўдзячная жыхарам горада, якія далі мне шанец ўдзельнічаць у выбарчай кампаніі і паставілі свой подпіс у такі сімвалічны дзень: Міжнародны дзень абароны правоў чалавека. Падпісная кампанія толькі пачалася, і я жадаю сваім калегам і жыхарам горада Брэста поспехаў у адстойванні сваіх правоў на горад, у якім хочацца жыць» – дадае Ганна Канюс.

Прэс-служба Брэсцкай абласной арганізацыі БСДП