Жахі на веладарожках у Брэсце: што змянілася

А вось у іншых месцах, згаданых у папярэднім матэрыяле – як было небяспечна для жыцця, так і засталося. Таму неўзабаве выйдзе другая серыя велажаховіка.

https://1reg.by/2021/08/04/dze-mozhna-zag-nuc-bresckamu-velas-pedyistu/

Пачулі нас насупраць Трышынскіх могілак, дзе нядаўна адкрылі новы офіс Белгазпрамбанка. Нагадаю, там праехаць па штатнай веладарожцы з цэнтра ў мікрараён “Усход” можна было праз вузкую пройму ў высокім (20 сантыметраў) бардзюры.

Шчарбіна не дазваляла размінуцца двум раварыстам, а яшчэ ўсе пехі туды таксама імкнуцца. Да таго ж направа заязджае ў мікрараён аўтатранспарт.

Сітуацыя супераварыйная і асаблівай трымценнасці дадавалі вострыя краі той шчарбіны ў бардзюры. Калі праязджаеш міма, заўсёды ўяўлялася, як лёгка яны рэжуць арганіку, як расступаецца цела і дае выглянуць белай костцы нагі або шэраму змеціву чэрапа…

Цяпер у шчарбіны нехта згладзіў вострыя краі: у праекцыі яна стала шырэйшай. Што ж, гэты нехта бадай што зрабіў што мог, і на гэтым яму вялікі дзякуй.

Дарожнікі, якія правілі ў гэты час паласу вуліцы Маскоўскай, веладарожкай не займаліся. У іх больш маштабныя задачы і тэхніка. Тады хто? Можа, Белгазпрамбанк каго паслаў? Адгукніцеся, падзякуем адрасна!