У суседніх раёнах зніжэнні істотныя – дзе на 20, дзе на 30 працэнтаў менш затрыманых у стане алкагольнага ап’янення, у Баранавіцкім раёне, увогуле, амаль на 50… А вось у нашым раёне, нягледзячы на тое, што штрафы за гэтае парушэнне буйныя, што ў вадзіцеля забіраюць пасведчанне на тры гады, а ў выпадку паўторнага кіравання, увогуле, канфіскуюць аўто, – тым не меней, п’яных вадзіцеляў менш не становіцца. Затрымліваем і моладзь, і жанчын п’яных за рулём. Няўжо не палохаюць штрафы – от 50 до 100 базавых велічынь (ад 1 150 да 2 300 рублёў), калі затрымалі першы раз?
Нядаўна было дарожна-транспартнае здарэнне каля Мілеек, калі нецвярозы вадзіцель “арганізаваў” ДТЗ, у выніку якога пацярпела аж 7 чалавек. ДТЗ каля Няхачава, у выніку якога аўто вылецеў у кювет і перакуліўся, таксама на сумленні нецвярозага ліхача. Штосьці падобнае адбылося каля в. Заполле, там аўто, якім кіраваў п’яны вадзіцель, “ўляцела” ў дрэва.
Як бачыце, летні перыяд – сезон масавага адпачынку – многіх нашых грамадзян “прадугледжвае” і катанне на аўто ў нецвярозым стане. Супрацоўнікі ДАІ будуць і надалей бескампрамісна змагацца з такой з’явай, але мы спадзяваемся і на нераўнадушнасць нашых грамадзян, якія падкажуць, што той або іншы гора-вадзіцель не пабаяўся ў нецвярозым стане сесці за руль і накіраваўся ў падарожжа. Дарэчы, у гэтым сэнсе нам у апошні час стала працаваць лягчэй. Ледзь не штодня атрымліваем паведамленні ад грамадзян аб падобных парушэннях.
Карыстаючыся выпадкам, хачу звярнуць увагу, што і сітуацыя з матацыклістамі і скутэрыстамі застаецца складанай. Міліцыя патрабуе, каб яны выкарыстоўвалі шлемы, але ж бяспека патрэбна не міліцыі, а матацыклістам! У нас зафіксаваны выпадак, калі па лясной дарозе на “Мінску” ехаў ляснік, а наперарэз раптам выскачыла казуля – матацыкліст упаў, атрымаў траўмы. Каля Горталя бацька з сынам на палявой дарозе ехалі на матацыкле, але ў адзін з момантаў транспартны сродак занесла, абое упалі, сын атрымаў цяжкія пашкоджанні… Матацыкл – транспартны сродак, які нясе небяспеку, не забывайце пра гэта. Лета, калі яны найбольш эксплуатуюцца, яшчэ толькі перайшло за экватар.
Васіль ЖУР, начальнік АДАІ Івацэвіцкага РАУС