У Пінску адбываецца апошні судовы працэс за акцыі недармаедаў

Напачатку паседжання 28 ліпеня Аляксандр Аўсеенка заявіў хадайніцтва аб адводзе суддзі Андрэя Бычылы, заявіўшы, што не давярае яму “з-за ўдзелу ў ранейшых палітычных прысудах”.

Як распавёў пінскі праваабаронца, сябра руху “За свабоду” Алесь Рамановіч, Аляксандра Аўсеенку судзяць за ўдзел у акцыі, якая прайшла 26 сакавіка ў Пінску.

“Сёння суд перанеслі, каб запрасіць і апытаць сведкаў у гэтай справе. Адным са сведкаў ён запрасіў кіраўніка пінскага ГАУС Сарочанку. Але у частцы хадайніцтва аб допыце міліцэйскага начальніка суддзя адмовіў. Таксама, Аўсеенка запрасіў, каб з гарвыканкаму ўзялі даведку, ці была нейкая забарона на акцыю ў гэты дзень. Аўсеенку судзяць самым апошнім, гэта ўжо другі разгляд ягонай справы пасля адмены ранейшага выраку Пінскага суду абласным судом. Першы раз Аўсеенку было прысуджана 20 базавых штрафу. Аднак Брэсцкі абласны суд адмяніў той прысуд з-за таго, што там былі парушэньні працэсуальныя.” – распавёў Алесь Рамановіч.

Наступнае паседжанне па справе Аляксандра Аўсеенкі адбудзецца ў Пінску 10 жніўня а 11 гадзіне.